رسالة مفتوحة الى رئيس وزراء ليبيا, فائز السراج ,من مواطنة في بنغازي

بعد التحيه,

المفروض اني انهنيك على دخولك الى طرابلس باقل اضرار ممكنة. في بلاد زي بلادنا, واللي اي حركة سياسية ممكن تسبب في حرب, دخولك بسلام يعتبر انجاز رائع.

انا حنكون صادقة معك, فكرة حكومة الوفاق ماكنتش مقتنعة بها واجد. لأن الفكرة كلها كانت تدور حول قضية عدم تسليم السلطة من الحكومات السابقة, من شرذمة من السياسيين الفاسدين اللي حطوا السلطة والمال فوق كل شىء. ولذلك انا ماحسيتش ان تكوين حكومة الوفاق انجاز, بل ابتزاز.

لكن مرات الحاجة الصحيحة في العالم الافتراضي والحاجة الضرورية في الواقع يكونان عكس بعضهن, وللأسف هذه كانت هي احدى المرات. شفت مدينتي تمزقت من مجموعات متطرفة وخشت في حرب شعواء. شفت اصدقائي في العاصمة يعانون من صعوبة الحياة اليومية وخائفين من المجموعات المسلحة. سمعت قصص من اهلي في الجنوب عن تدهور وضياع فزان وعزلهم عن باقي البلاد.

لهاذا السبب, انا حندعمك, وحندعم حكومة الوفاق. ربما يكون مش هو الاختيار الصحيح, ولكن لأن الوضع لم يعد يحتمل و مافيش اختيار اخر.

ولكن هذه الثقة اللي عطيتها لحكومتكم غصبا عني, ياسيد سراج, ممكن ان تسلب بكل سهولة. لأن مش عندك حكومة سابقة و لكن حكومتين فلك ان تتعلم من اخطائهم. سبب خراب ليبيا معلق في رقاب هاتين الحكومتين. المؤتمر الوطني العام قووا المليشيات وتحالفوا مع الشيطان, اما مجلس النواب فاختبؤوا في قلعة و زادوا نار الحرب وقود. هم الاثنين سمعوا صراخ الناس و تجاهلوهم.

انا متأكدة ان عندك فريق كامل من المحللين و المساعدين يقولولك في نفس الكلام هذا. لكن انا انقول فيه لك لأني عايشه في وسط هذه الواقع. نجاحك بالنسبه ليا مش نجاح سياسي, نجاحك هو انقاذ ماتبقى من هذه المدينه وهذه البلاد. و فشلك حيعني النهاية بالنسبة لنا. سواء نبو ولا مانبو, حياتنا و حياتك مرتبطات, و انا حندعمك علشان ننقذ حياتي.

لو في حاجة وحدة بس تقدر اتديرها في فترة حكمك, خلي الحاجة هذه انك تسمع للشعب. مطالبنا حاليا مش صعبات واجد, بس وظيفتك مش فقط انك توفر الاشياء الاساسية. ايضاً, وظيفتك مش انك اتعود بالبلاد الى الوضع اللي كانت فيه في 2011, لأن هذا الوقت كان بداية المشاكل لنا. الان عندك الفرصة انك تكون اول رئيس وزراء ينهي عقلية “الثوار”. نحن معش نبو ثورة, نبو دولة. مش دولة لبنغازي فقط, او دولة لطرابلس او مصراته فقط. نبو دولة للجميع.

كون اول رئيس وزارء ليبي لا يتهم الشباب بتعاطي حبوب الهلوسة  لما يتظاهروا ولكن اسأل عليش يتظاهروا. كون اول رئيس وزراء لا ينشر الاكاذيب و المؤامرات على عدوه, لكن يتفاهم معه. كون اول رئيس وزراء يبدأ في حل الازمة, وما يشاركش في ازديادها.

نحن الاثنين معماريين, ونعرفوا كيف انصمموا مباني و مدن للناس. و نعرفوا ايضا ان افضل تصميم في نظرنا احيانا لا يستجيب الى احتياجات الناس. نحن مش طالبين افضل تصميم و تحقيق اهداف خيالية, اللي نبوه فقط هوحياة طبيعية. نبو نمشوا لمدارسنا وجامعاتنا وأعمالنا بدون خوف من القذائف العشوائية. نبو انسافروا بدون مانحسوا بالذل والمهانة اللي قاعدين انتعرضوا لها توا. نبو العدالة, والامن و الامان, والحرية. نعم, الحرية. صح, نحن الان ضعفاء, لكن هذا لا يعني انا نردوا الى القيود من جديد من اجل الامان.

حضرتك قاعد الان في منصب سلطة, و تقدر ان تقرر اي حاجة, من ضمنهن قرارات تكبح الحريات. لكن من فضلك لاتنسى, ياسيد سراج, ان بنغازي, حتى و هي مكسورة, مش حتسكت لأي شخص يحاول ان يكبت حريتها. خلينا نشتغلوا مع بعضنا, مش ضد بعضنا, وننقذ هذه البلاد.

مع تحياتي,

ندى عبدالقادر,

بنغازي ليبيا

31\03\2016

Advertisements

2 thoughts on “رسالة مفتوحة الى رئيس وزراء ليبيا, فائز السراج ,من مواطنة في بنغازي

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s